Enfants sens papiérs de menjar a la cantina de lor escòla.

A Montalban (Bas Carcin), an enebit a un trentenat d’enfants sens papièrs de manjar a la cantina de lor escòla, segon lo Ret Educacion sens Frontièras (RESF). Aqueles enfants son escolarizats per l’educacion estatala francesa, e segon la lei solament se pòdon sèire en classa, çò expliquèt La Dépêche. Se tracta de mainatges originaris de Siria e d’Africa, qu’an drech d’anar en cors amb los autres escolans, mas an pas cap de drech de gardariá, ni de bus, ni de cantina. “O avèm ensajat tot. Quitament la somacion del defensor dels enfants, Dominique Baudis, a pas agut cap d’efièch sus la consolessa. Anam sasir, de segur, lo tribunal administratiu. La nòstra accion es dins l’encastre dels tèxtes e de la Convencion dels Dreches de l’Enfant”, çò disiá un responsable local d’RESF a Le Figaro. De son costat, la comuna a avalorat que per eles son solament 18 los mainatges en aquela situacion. La consolessa, Brigitte Barèges, argumenta “una manca de mejans e l’abséncia d’informacions”. Barèges rapèla qu’an “ja 128 enfants demandaires d’asil escolarizats dins las escòlas de la vila, e tanben 68 enfants de la comunautat de las gents del viatge”.