Vau esperar çó que se passa en Catalonha (2014)

Martin Malvy:Lo President de Miègjorn-Pirenèus se reüniguèt amb lo president de Catalonha Artur Mas dijòus passat per trachar de desvolopar mai prigondament l’Euroregion Pirenèus-Mediterranèa “Vau esperar çò que se passa en Catalonha. Après vos respondrai se còpii lo modèl o pas”, çò diguèt dijòus passat lo president de Miègjorn-Pirenèus, Martin Malvy, a prepaus de las questions d’un jornalista d’un mèdia d’expression francesa sul procès d’independéncia de Catalonha. *Martin Malvy veniá de se reünir amb lo president de la Generalitat de Catalonha, Artur Mas, per s’acordar sus las nòvas grandas linhas que deuriá aver l’Euroregion Pirenèus-Mediterranèa los sièis ans que venon. *E mai se de tensions entre Miègjorn-Pirenèus e Catalonha avián precedit aquela reünion, pr’amor dels impagaments del govèrn catalan de las partidas budgetàrias euroregionalas, los dos presidents exprimiguèron lor desir de desvolopar l’Euroregion pus prigondament. *La tòca es de “capitar de donar mai de velocitat” a l’Euroregion per aténher mai de ressorsas, çò declarèt Artur Mas. Dins aquel sens, de fonts del govèrn catalan an confirmat que se donarà un nòu impuls al secretariat general de l’Euroregion a Barcelona. *Los dos presidents foguèron d’acòrdi que caliá autrejar a l’estructura euroregionala mai de vam, de sosten e de ressorsas. Malvy remarquèt l’interès de l’Euroregion pels quatre territòris que ne fan partida, perque “gràcias a l’Euroregion se pòt obténer de fonzes europèus de desvolopament de projèctes euroregionals”. Un exemple d’aquela politica seriá lo projècte Creamed, finalizat en 2013, qu’a permés la creacion e lo desvolopament d’entrepresas amb d’amiras de mercat euroregionalas. *Per rapòrt a l’oficialitat de la lenga occitana dins l’Euroregion, cap dels dos presidents diguèt pas res. Ça que la, s’agís d’un sicut qu’esperam dempuèi abril de 2012, quand la secretària generala de l’Euroregion, Antònia Sabartés, declarèt a Jornalet que l’occitan vendriá una de las lengas oficialas de l’organisme