Es prioritats dera Eurozòna entath 2013 deuen èster "mantier eth ritme des reformes economiques

-Mès demane seguir damb reformes-

Rehn ve signes d'estabilizacion a Espanha

 

Avertís qu'"es pròplèus mesi encara seràn dificiles"

Eth vicepresident dera Comission e responsable d'Ahèrs Economics, Olli Rehn, a dit aguest diuendres que ve signes d'estabilizacion en païsi coma Espanha o Itàlia, que se rebaten ena queiguda des sòns còsti de finançament, mès a reclamat prosseguir damb es reformes per consolidar era recuperacion.

  
En un discors, Rehn a destacat qu'es "darrèri indicadors de sentiment economic d'aguesta setmana mòstren signes d'estabilizacion, e era fidança enes mercats financèrs creish considerablament".

 Tanben a indicat qu'"açò se rebat ena queiguda des còsti de finançament entà païsi coma Irlanda, Itàlia e Espanha. Ager, tant Itàlia coma Espanha aueren subastes de bons damb plan d'èxit".

Era tornada dera fidança se deu, segontes eth responsable d'Ahèrs Economics, ara "actuacion determinada" a nivèu europèu e des estats membre e ath programa de crompa de deute anonciat peth banc Centrau Europèu (BCE). Rehn a apuntat qu'"a Espanha, es exportacions aumentèren lèu un 20% en tèrmes reaus entre 2009 e 2011".

Totun, Rehn a alertat qu'era reduccion des tensions enes mercats de deute "encara no a condusit cap ua relaxació sufisenta des condicions creditícies enes païsi vulnerables, a on plan de pimes s'afronten a granes dificultats per obtier finançament". Tanben a senhalat qu'"ath delà, eth sentiment pòt cambiar facilament".

Eth vicepresident der executiu comunitari a dit qu'"es pròplèus mesi encara seràn dificils perque era economia seguís fèbla e es nòsti ciutadans encara senten er impacte dera crisi. Se demore qu'Europa torne ath creishement sonque graduaument ath long deth 2013, e era recuperacion se harà mès fòrta a mesura que s'auance cap ath 2014".

Ath delà, eth caumatge ena eurozòna a artenherut un "maxim istoric" der 11, 8%, mès damb fòrtes divergències entre eth 4,5% d'Àustria e eth 26% "totaument inacceptable" d'Espanha.

Rehn a indicat: "Per açò ei important qu'era nòsta actuacion politica seguisque en tot èster determinada e coerenta. Deuem prosseguir damb eth reequilibri e era reforma des nòstes economies, per arténher creishement, competitivitat e trabalh".

  Segontes era sua opinion, es prioritats dera Eurozòna entath 2013 deuen èster "mantier eth ritme des reformes economiques", melhorar era competitivitat dera industria damb acòrds comerciaus damb tresaus païsi, possar era inversion productiva, prosseguir damb era consolidacion fiscau e completar era reforma dera union monetària