Liceans e Alidé Sans preparan una cançon (Prumèr Album)

Ua iniciativa de las interessantas se hè entre les licèus de l’Isla de Baish, Sent Gaudenç e Aran a l’entorn de la cançon occitana. L’idèa ei simpla: s’agish de hèr cantar joens en occitan. Au jorn d’auèi, i a quasi pas nat joen, de mens de 21 ans, que hè concèrts en lenga nòsta. Un còp aver citat la cantaira aranesa Alidé Sans, qu’a 20 ans, ei de mau trobar d’autes. *L’avénguer de l’occitan se pòt concéber que dab l’adesion de la joenesa. Alidé Sans, que coneish ara un cèrt succès, vòu hèr un prumèr album en seteme qu’arriba. L’enregistrament se harà a Barcelona dins un estudi professionau. I participaràn tanbens cinc liceans d’occitan de l’Isla de Baish, que musiquejan tanbens. S’agish de Sofia Montelh (piano), Antoine Finòs (baisha), Edith Seguièr (percussions), Lisa Fraresso (flaüta traversièra e votz) e Anaïs Gaux (votz), que s’uniràn dab Alidé Sans sus ua canta. Poiré estar ua represa de Bob Marley que se ditz Tres Auserons. *Entà aqueste projècte ambiciós, cau mejans e associacions, com País de Catinon de Sent Lis o la region Miegjorn Pirenèus l’an comprés. Atau l’associacion sentlisiana balharà 1000 èuros e la region acordarà 6000 èuros entà sosténguer le projècte de creacion musicala occitana, entà e per la joenesa. Comprenguen l’interès de hèr cantar joens en occitan sus musicas modèrnas. *Au delà, s’agish d’aviar aquestes liceans a hèr concèrts en occitan. Atau, le grop d’adolescents lisleses, Leviathan (E. Seguièr e A. Finòs), poirén interpretar produccions en lenga d’òc dins concèrts. Alidé e los cinc gojats e gojatas haràn un concèrt en la Val d’Aran, le 16 de mai, davant un centenat de joens deus licèus de l’Isla de Baish, Sent Gaudenç e Vielha. La cantaira aranesa a comprés de plan l’interès d’associar d’autes gojats, parièr se son de l’aute costat de la termièra, entà hèr creacions actualas. *Per la musica, le prètzhèit ei tanben de hèr escambis entre les gojats d’Aran e de la Gasconha de l’estat francés. Un cinquantenat de liceans comengeses e de Savés seràn aculhits peu licèu d’Aran, entà passar ua setmaneta en occitan, a la prima.