-En plea polemica per espionatge-

Mas presidís era dusau reünion anticorrupcion

 

 

Era dusau reünion anticorrupcion convocada peth president dera Generalitat, Artur Mas, reünirà aguest diuendres representants d'institucions parlamentaris, judiciaus e de contròtle, e s'a anonciat dempús gésser ara lum diuèrsi casi de corrupcion qu'afecten CiU, eth PSC e eth PP, e abans de descaperar-se era polemica sus er espionatge a Catalonha.

Era trobada començarà as 10.00 ores en Palau dera Generalitat e i assistiràn era presidenta deth Parlament, Núria De Gispert; eth deth Tribunau Superior de Justícia de Catalonha (TSJC), Miguel Ángel Gimeno; eth fiscau superior de Catalonha, Martín Rodríguez Sol; eth Sindic de Compdes, Jaume Amat; eth Sindic de Grèuges, Rafel Ribó, e eth director dera Oficina Antifraudaria (OAC), Daniel de Alfonso.

Es madeishi participants assistiren eth 6 de hereuèr ara prumèra reünion, en qué se prepausèc dar reng de lei a un còdi d'autoregulacion sus finances des partits e foncionament des campanhes electoraus qu'es grops deth Parlament de Catalonha decidiren eth 2001, e l'incorporèc as futures leis catalanes de transparéncia e electorala.

Eth degoteig de casi de corrupcion e era presomptiva implicacion de responsables politics a possat institucions e partits catalans a préner mesures, e eth Parlament catalan possèc al principi de mes es trabalhs dera lei electorala e era de transparéncia.

Eth president Artur Mas a assegurat qu'en aguesta dusau reünion es diferentes parts anarien damb proposicions per escrit.

Ath Marge deth cas Bárcenas, qu'a metut eth PP e eth president espanhòl, Mariano Rajoy, en punt de mira, a Catalonha i a sus era taula auti casi qu'afecten CiU, coma eth deth Palau dera Musica; eth des ITV; eth Mercuri; eth Clotilde, en quau pòt èster imputat eth deputat dera federacion ath Parlament e a exalcalde de Lloret, Xavier Crespo, e hè pòc se dictèc senténcia deth cas Pallerols, de finançament irregular d'UDC. Ath delà, era Audiència Nacional seguís en tot investigar eth cas Pretòria que se descaperèc eth 2009.

D'auta banda, contunhe era polemica pes presomptius casi d'espionatge, dempús qu'er 11 de hereuèr gessesse ara lum ua trobada ath restaurant La Camarga de Barcelona entre era lidèr deth PP, Alicia Sánchez Camacho, e era exgojata d'un des hilhs de Jordi Pujol.

Eth Govèrn catalan no escarte ua vinculacion d'aguestes escotes damb eth procès sobiranista, e defen que no sigue unicament er Estat espanhòl eth que se n'aucupe, pera quau causa aguest dimars eth Conselh Executiu dera Generalitat constituïc ua comission interdepartamentala.