Detengudi dus estafadors a Barcelona

Detengudi dus estafadors per enganhar damb faussi hons d'inversion en sagèths

 

Es Mòssos d'Esquadra an detengut a Barcelona dus òmes per presomptivament enganhar ua setentena de persones damb faussi hons d'inversion en sagèths e lo fraude pòt ascendir a un milion e miei d'èuros, segons a informat aguest deluns era policia catalana.

  
Segontes era investigacion, tutelada peth Jutjat d'instruccion 4 de Sant Boi de Llobregat, es detenguts planificauen lo fraude e premanien ua encuedada metuda en scèna per no desvelhar sospèites enes potenciaus victimes, en tot hèr-les creir qu'èren expèrts ena gestion de hons investidi ena compravenda de sagèths.
 
Es presomptius estafadors contactauen damb persones interessades en negòci de crompa e venda de sagèths, e les convencien qu'es sòs qu'investissen s'utilizarien per aquerir sagèths.
 
Aguesti sagèths, segontes era version que dauen es detenguts as victimes, dempús se deuien subastar e revéner per sobre deth prètz iniciau, de manera qu'en acabar eth termini de temps decidit entre es dues parts, eth client recuperaue era inversion iniciau ath cant des beneficis.

Es investigadors an constatat peth moment 70 victimes, a tota Catalonha e a Castelló, qu'en acabar eth termini decidit no an arrecebut es beneficis, perque no i a agut subasta, ni era inversion hèta; dempús es gestions, es agents an verificat qu'es sagèths que s'auie investit no auien valor.

 Quan bèra ua d'aguestes enterpreses hège falhida, es estafadors aufrien as victimes recuperar era inversion d'aguesta enterpresa, sempre que contunhèssen en tot investir en sagèths; ara fin no recuperauen arren e perdien era naua inversion.

   Es Mòssos trabalhen damb er ipotèsi qu'es ara detengudi harie mès de 20 ans que se dedicarien a aguesta activitat en tot utilizar burèus de Barcelona e qu'era fraudaria superarie eth milion e miei d'èuros.

   Enes escorcolls enes pisi des detenguts, es agents recuperèren 4.610 èuros en efectiu, chècs bancaris per valor de 23.000 èuros e nombrosa documentacion relacionada damb es dues enterpreses vinculades damb era presomptiva fraude filatelica.