Era Val d'Aran a propiciat era lenga occitana

Era lengua occitana ja gaudie d’ua projeccion internacionau, mès surtot enes encastres dera universitat, dera cançon e dera literatura. Era vida lingüistica qu’er aranés li a dat ar occitan li a significat qu’age un emparament enes institucions europèes. *Ara ei possible emplegar er occitan en quauques instàncies europèes e recéber responsa des institucions en aguesta madeisha lengua. Eth dret i é. Cau qu’es ciutadans l’empleguen e l’exigisquen. Era prumèra pèira ena Union Europèa ja ei metuda. *Es ciutadans occitans que non pòden adreçar-se en occitan ar alcalde deth sòn pòble, pòden adreçar-se ena sua lengua a quauques institucions europees. Era creishença naturau dera Union implicarà era creishença des drets lingüistics der occitan. Er efècte serà geometric, exponenciau. A nivèu espanhòl tanben ei possible emplegar er occitan en Senat. *E ara, per mor des insisténcies araneses e des sensibilitats catalanes era lengua occitana gaudirà, en Catalonha e en Estat espanhòu, d’ua Acadèmia de lengua que plaçarà er occitan ath mès naut nivèu. *Son multiples es ocasions en qu’Aran a possat un projècte deth qu’Occitània n’a trèt benefici, coma ena prodoccion deth traductor automatic der occitan-catalan-castelhan o ena promocion dera magnifica trobada de ciutats catalano-occitano agermanades, que damb ua grana participacion, qu’originèc era creacion dera associacion d’electes occitans.