Qu'Aran non rompa amb Espanha (2014)

Se presentèt dissabte passat, a l’ostalariá Tuca de Vielha, la Societat Civila Aranesa (SCA), l’entitat “sòrre” de la Societat Civila Catalana (SCC) qu’amassa de personas e de collectius unionistas espanhòls opausats a l’independéncia de Catalonha. Participèron a l’acte qualques dirigents de l’SCC amb de representants politics d’Unitat d’Aran e del Partit Popular. Dins lo manifèst constitutiu, entitolat “Per rompre pas”, la Societat Civila Aranesa revendica que la Val d’Aran es “un exemple de convivéncia a respècte de la diversitat”. Pr’amor d’aquò, defend que lo país occitan “deu demorar restacat a Catalonha, a Espanha e a Euròpa, per ajudar a melhorar los assemblatges entre caduna d’elas, a partir del respècte de las leis e de la democracia”. L’entitat es formada per “de personas notablas de la societat aranesa, preocupadas pels efièches socials, economics e politics que lo procès independentista catalan pòsca generar demest los ciutadans”. An anonciat qu’organizaràn d’activitats conjonchas amb l’SCC e que partejaràn las ressorsas. Lo president de l’SCC, Josep Rosiñol, soslinhèt que las doas entitats “partejan las meteissas inquietuds e chepics” e que naisson en de procèsses “parallèls”, çò que reafirmèt la coordenaira de la plataforma aranesa, Maria Teresa Vidal, que remembrèt qu’en cap de cas d’agís d’una “filiala” mas d’una entitat “sòrre”. “Naissèm de la man de l’SCC. Dins una societat normala, deurián pas existir de plataformas d’aqueste tipe. Mas sèm arribats a un nivèl de crispacion que capvira la realitat. Los araneses nos podèm pas veire dins la situacion de causir se nos volèm separar d’Espanha”. Lo 23 d’abril passat, en aprofechant la simbolica jornada de Sant Jòrdi, se presentava l’SCC a Barcelona davant aperaquí 1300 personas. E mai se l’acte d’Aran se passèt en espanhòl, dins l’acte de presentacion de l’SCC a Barcelona se legiguèt lo manifèst en espanhòl, en catalan e en occitan d’Aran.